Skoðað í 1904 skipti
Sumir heimildarmenn fréttamiðla eiga ekki skilið vernd eða nafnleynd þegar upp kemst um að „heimildir“ þeirra eru uppspuni frá rótum og eiga sér enga stoð í raunveruleikanum.
Einnig eiga þeir frétta og blaðamenn sem verða uppvísir að því að flytja falsfréttir eða bera fyrir sig „heimildarmenn“ sem ekki eru til í raunveruleikanum að vera teknir á teppið af Blaðamannafélagi íslands, þó svo það félag rísi ekki undir nafni vegna algjörs aðgerðarleysis á öllum sviðum og hvað þá heldur að standa undir þeim siðareglum sem blaða og fréttamenn hafa sett sér og fara eftir þeim.
Í dag fengu lesendur Fréttablaðsins óvæntan „glaðning“ með morgunkaffinu þegar þar birtist frétt sem er ekki með nokkru móti hægt að flokka öðru vísi en sem algjöra falsfrétt en þar er því haldið fram að brestir séu i samstarfi foristu verkalýðsfélagna fjögurra sem eru saman með mál sín hjá Ríkissáttasemjara, samkvæmt ónafngreindum heimildarmönnum innan verkalýðshreyfingana.
Formenn verklýðsfélagana segja enga bresti í blokkinni og að hópurinn hafi aldrei verið sterkari, samkvæmt grein í Kjarnanum eftir að falsfrétt Fréttablaðsins kom út, en þar segir meðal annars:
Formenn VR, Eflingar og Verkalýðsfélags Akraness telja ekki vera „brest í blokkinni“ eins og gefið er í skyn í frétt á forsíðu Fréttablaðsins í dag. Í henni segir að ólíkir hagsmunir félagsmanna gætu gert verkalýðsfélögum í samfloti erfitt að klára kjaraviðræður saman.
Vissulega geta hagsmunir einstakra félaga verið mismunandi í einhverjum tilfellum. En skörunin er mun meiri heldur en hitt. Það er okkar allra hagur, hagur samfélagsins, að hér geti fólk lifað af dagvinnulaunum, segir Ragnar Þór og bætir því við að í kröfugerðum félaganna komi þetta berlega í ljós þar sem eitthvað af brýnum hagsmunamálum sé að finna fyrir alla hópa.
Sólveig Anna Jónsdóttir, formaður Eflingar, tekur í sama streng og Rangar Þór en hún segir að frétt Fréttablaðsins eigi ekki við rök að styðjast.
Viðar Þorsteinsson, framkvæmdastjóri Eflingar, gagnrýnir forsíðufrétt Fréttablaðsins í Facebook-færslu í morgun og segir hana fjölmiðlaspuna. Ódýrasti fjölmiðlaspuni ársins er þó ekki of ódýr fyrir forsíðu Fréttablaðsins!
Vilhjálmur Birgisson, formaður Verkalýðsfélags Akraness, segir í samtali við Fréttablaðið það algerlega af og frá að um bresti í samstöðu félaganna fjögurra sé að ræða. „Við erum mjög samhent í þessari vinnu og stöndum og föllum með henni saman.“ Hann segir fund forsetateymis ASÍ með stjórnvöldum á morgun geta haft úrslitaáhrif á hvort samningar náist en næsti fundur félaganna fjögurra hjá Ríkissáttasemjara verður á fimmtudag.
Í ljósi þess sem komið hefur fram frá verkalýðsforistunni verður ekki hægt annað en flokka „frétt“ Fréttablaðsins sem ómerkilegan áróður auðvaldsins og tilraun til að tortryggja verkalýðsforistuna með því að reyna að reka fleyg á milli foristumanna einstakra verkalýðsfélaga.
Blaðamaður sem vinnur með slíkum hætti getur ekki ætlast til að vera talin trúverðugur í framhaldinu og ber því að taka allar fréttir sem viðkomandi skrifar af mikilli tortryggni og afla staðreynda áður en hún er tekin trúanleg.
Aðalheiður Ámundadóttir fréttaritari á Fréttablaðinu er staðin að óvönduðum vinnubrögðum og við það situr þangað annað kemur í ljós.
Skoðað í 1904 skipti